Nú eru að gerast spennandi hlutir í vegvísun á Íslandi.  Garmin hefur gefið út sína kortseríu fyrir árið 2010 af Norðurlöndunum og þar er Ísland inni í fyrsta skipti. Öll Norðulönd kosta samkvæmt heimasíðu Garmin 37 pund eða um kr. 8000.  Gögnin af Íslandi eiga uppruna sinn hjá Loftmyndum sem hafa unnið með NAVTEQ að frágangi gagnanna.  Þetta þýðir að bílaframleiðendur munu geta farið að bjóða Ísland í sína bíla. Þetta mun gleðja margann bíleigendann á Íslandi sem á "glæsivagn"  með innbyggðu vegvísunarkerfi sem engin gögn hafa verið til í til þessa. 

https://buy.garmin.com/shop/shop.do?pID=8427

Landmælingar Íslands og Loftmyndir ehf. hafa endurnýjað samning sem gerður var í upphafi árs 2009. Þá var samið um afnot Landmælinga af myndkortum Loftmynda ehf. við skráningu og staðsetningu örnefna. Nú hefur verið ákveðið að bæta við kortasjá á heimasíðu Landmælinga þar sem þessi örnefni verða birt almenningi. Hér er um að ræða samvinnuverkefni þar sem Loftmyndir ehf. reka kortasjá með myndkortum en Landmælingar birta örnefni sem til eru í gagnagrunni stofnunarinnar og nýta til þess WMS tækni. Það er nokkur nýlunda í landfæðilegri þjónustu fyrir almenning á Íslandi.

Fornleifavernd og Loftmyndir ehf. skrifuðu nýlega undir samning um rekstur kortasjár á heimasíðu Fornleifaverndar. Í þessari sjá er hægt að skrá fornleifar á samræmdann máta og að því verki geta margir aðilar komið þar sem um veflausn er að ræða. Fyrir er stofnunin með samning um aðgang að öllum myndkortum Loftmynda á WMS sniði til skráningar fornleifa í innra tölfukerfi stofnunarinnar. Með tilkomu hinnar nýju kortasjár opnast möguleiki á því að skrá bæði nýjar og eldri fornleifar í dreifðri vinnslu. Einnig getur almenningur og fagaðilar nú skoðað öll gögn um fornleifar á einum stað ofan á loftmyndum eða kortum frá Loftmyndum ehf. Þessi aðferðafræði tryggir samræmda og nákvæma hnitsetnigu fornleifa. 18.jan. 2010

Loftmyndaflug sumarsins gekk vel þrátt fyrir fremur óhagstætt veður síðsumars. Loftmyndaflug þessa árs var að venju blandað lágflug (1400m flughæð) og miðflug (3.300m flughæð) og nær alls yfir um 14.000 ferkílómetra. Nú þegar er úrvinnsla loftmyndanna hafin og má búast við að nýju myndirnar skili sér til viðskiptavina okkar í kortagrunna, hæðarlíkön og myndkort öðru hvoru megin við áramót.

Eins og öllum er ljóst sem sóttu hinn velheppnaða morgunverðarfund Loftmynda ehf. á Grand Hótel þann 1. apríl síðast liðinn þá var þar í gangi getraun sem þátttakendur máttu spreyta sig á. Þar átti að að þekkja Hvanneyri á loftmynnd frá síðasta sumri.  Nær allir svöruðu rétt þ.a. dregið var úr réttum svörum. Þeir heppnu voru Hólmþór Morgan hjá Kateco og Jón Axel Antonsson hjá Flugstoðum. 

Örn afhendir Jóni Axel verðlaunin.

Örn afhendir Hólmþóri verðlaunin.

Góð mæting var á morgunverðarfundi Loftmynda og troð fullt út úr dyrum í ráðstefnusal Grand Hotel í morgun.  Farið var yfir stefnu og sýn fyrirtækisins, hvenig landfræðigögn eru unnin út úr loftmyndum og hvernig opnir staðlar internetsins gera miðlun landfræðigagna einfaldari og ekki síst ódýrari.

Loftmyndir ehf. halda morgunverðarfund á Grand Hotel 1. apríl næstkomandi (kl. 9:00-11:00) þar sem kynnt verða gögn og aðferðafræði fyrirtækisins.  Fyrst verður farið yfir stefnu og markmið við bæði gagnaöflun og gagnamiðlun. Landlíkan fyrirtækisins verður kynnt sem nú nær til alls landsins og er það nákvæmasta sem til er.  Síðan verður farið yfir nýja aðferðafræði Loftmynda að nota opinn hugbúnað sem er ókeypis og ekki þarf heldur að greiða af viðhaldsgjöld.  Að lokum verða kortasjár fyrirtækisins kynntar en þær byggja á þessari nýju hugmyndafræði um opinn hugbúnað. 

Loftmyndir ehf. og Landmælingar Íslands hafa skrifað undir samstarfssamning um örnefnaskráningu. Loftmyndir hafa komið upp  kortasjá þar sem starfsmenn Landmælinga og örnefnasviðs Stofnunar Árna Magnússonar í íslenskum fræðum geta staðsett örnefni með aðstoð myndkorta Loftmynda.

Loftmyndir geta verið ómetanlegar heimildir um breytingar á náttúrufari. Það má greinilega sjá á þessum myndkortum sem annarsvegar eru frá árinu 1999 og hinsvegar frá 2008.  Til þess að þetta nýtist sem skildi þarf að vinna myndkort eftir loftmyndunum þ.a. samanburður sé auðveldari. Það hafa Loftmyndir ehf. nú gert síðan 1996.  Einnig má nota loftmyndir til þess að mæla þynningu á jökli sem þessum og þar með er kominn stuðull til að spá fyrir um enn frekari breytingar miðað við gefnar spár um hitastig næstu ára.

 Færið músarbendilinn yfir myndina til að sjá breytingarnar.

Fyrri mynd: 6.ágúst 1999
Seinni mynd: 20.ágúst 2008

Loftmyndaflug sumarsins gekk vel og teknar voru á þriðja þúsund nýjar myndir. Viðskiptavinir okkar eiga von á að fá uppfærð kortagögn og ný myndkort í byrjun nýs árs. Annarsvegar miðflugsmyndir (um 3.300m flughæð) og hinsvegar lágflugsmyndir (um 1.400 m flughæð). Þessa dagana er unnið hörðum höndum að því hjá Loftmyndum að uppfæra kortagrunna og gera myndkort eftir nýju myndunum.  Viðskiptavinir okkar eiga von á að fá uppfærð kortagögn og ný myndkort í byrjun nýs árs. 

Undirritaður hefur verið tímamóta samningur um afnot Flugstoða af landfræðilegum gögnum Loftmynda ehf. Þar er bæði um að ræða gögn til kortagerðar sem og vegna hönnunar og viðhalds 58 flugvalla.

Hin sívinsæla loftmyndagetraun okkar fór vel af stað þetta árið.
Fjölmargir hafa sent okkur svör og flest þeirra voru rétt líkt og venjulega.
Að þessu sinni var það Ísar Logi Arnarson sem dreginn var úr stórum hópi svarenda.
Ísar fær að launum útivistarkort úr kortaflokknum "Af stað" frá Loftmyndum ehf.